Engaschaus ed activs en bia secturs
Tras mia lavur ell’economia e per diversas organisaziuns sun jeu directamein al puls dall’acziun. Quels engaschaments lubeschan a mi da seconfruntar directamein cun damondas concretas e sfidas ord la pratica. Quellas ein impurtontas per mia lavur politica. Era mes engaschaments voluntaris ellas spartas socialas, culturalas e communizeivlas cumpleteschan ed enriheschan mia lavur. Quellas occupaziuns dattan senn e cuntegn a mia veta. Cheutras sai jeu focusar meglier mia lavur politica cun e per il concarstgaun. En aschunta intervegnis Vus dapli davart mes engaschaments.
Dapi varga 20 onns astgel jeu s’engaschar en favur da Helsana Assicuranzas SA. Biars onns hai jeu menau la vendita en differentas regiuns dalla Svizra orientala. Dapi mi’emprema reelecziun el Cussegl naziunal lavurel jeu cun in pign pensum ella vendita dall’interpresa.
Il traffic public ei mia pissiun. La Svizra ei campiunessa en ir cul tren. Era egl avegnir duei il traffic public giugar ina rolla aunc pli prominenta sco mied da transport da massa. La LITRA ei sper miu mandat el Cussegl naziunal mia activitad principala.
La Svizra drova helicopters. Gest per las regiuns ein ils survetschs dil helicopter d’enorma impurtonta el sectur da salvament, logistica, turissem ed agid da catastrofas. Els prestan ina preziusa contribuziun al Servis public.
La regiun muntagnarda ei mia patria. Per indigens, fulasters, hosps e per l’economia ston quellas e restar attractivas. Ina vasta infrastructura da basa ei perquei da muntada centrala. Dapi passa 10 onns astgel jeu gidar a formar la politica dalla SAB.
Scadina aua minerala naturala ei in unicat. Quei ei d’attribuir al fatg che scadina fontauna ei singulara. Sco president s’engaschel jeu per la valurisaziun dall’ aua minerala naturala, per in product natural e per ils numerus posts da lavur.
https://mineralwasser.swiss/verband/ig-mineralwasser/grusswort-des-praesidenten/
La Kilchenmann SA (Part dalla Inno Digital Services AG) ei l’interpresa dominonta el sectur da audio/video en Svizra. Kilchenmann accumpogna, perschuada e digitalisescha. Mei fascinescha il fatg co varga 300 collavuraturas e collavuraturs colligian da 6 differentas sedias anora ils humans dad oz e damaun.
Creativitad e spért d’iniziativa – quei ei communicaziun.ch. In’agentura da communicaziun ambiziusa ed innovativa cun ina cultura d’interpresa impressiunonta ch’jeu sustegnel bugen sco amitg e commember dil Cussegl d’administraziun.
Suenter 40 onns datti puspei ina Fiasta da tir federala el Grischun. Igl arranschament bombastic cul center a Cuera ha liug a moda decentrala e duei carmalar 40’000 tiraduras e tiradurs e 100 000 visitadras e visitaders en nies Cantun. Cun la ESF2026 cumbinein nus pissiun e tradiziun e sestentein d’ organisar ina Fiasta da tir nunemblideivla.
Cun passa 100 purschidas da scolaziun en 30 spartas professiunalas ei la ibW la pli gronda instituziun da prefecziun sil sectur nununiversitar dalla Svizra sidorientala. Sco anteriur student da questa scola ed adherent dalla formaziun professiunala eis ei per mei in’honur dad esser president dalla Uniun da promoturs.
Pro Infirmis cusseglia, accumpogna e sustegn persunas cun impediment e lur confamigliars. Dapi varga 10 onns s’engaschel jeu sco commember dalla Cumissiun cantunala dil Grischun per l’independenza ed inclusiun da talas persunas.
L’Uniun Pro Lucmagn s’engascha per in menaschi irreproschabel e segir dalla via dil Pass dil Lucmagn duront igl unviern. Igl ei per mei in deletg da s’engaschar per quei project unic da cooperaziun denter ils cantuns Grischun e Tessin, denter las regiuns Valle di Blenio e Surselva, denter il romontsch ed il talian.
La Fundaziun ARGO porscha dimoras d’habitar, structuras dil di e posts da lavur per persunas cun impediments el cantun Grischun. L’integraziun sociala e professiunala da persunas cun impediments ei per mei in grond desideri.
La Fundaziun svizra dalla Greina intenda dapi sia 1986 da proteger integralmein la planira alpina dalla Greina. Per mei tucca quei territori che appartegn parzialmein a mia vischnaunca nativa da Sumvitg denter las pli bialas cuntradas naturalas dalla Svizra.
La Casa s. Giusep a Cumpadials ei la casa da vegls e tgira da mia vischnaunca nativa da Sumvitg. Igl ei ina pèrla, in liug che facilitescha da formar la veta ella vegliadetgna. El decuors dils davos decennis ha la casa saviu vegnir engrondida per esser fita e dumignar las sfidas digl avegnir. Nossa finamira primara ei il beinesser dils cussadents.
La promoziun dils quater dicziunaris naziunals sco ovras da referenza indispensablas vegn sustenida cun daners dalla Confederaziun. Nossa cumissiun accumpogna e sustegn ils dicziunaris en tut las quater linguas naziunalas e quei ton sil sectur scientific sco poliitic-scientific. Gest per il lungatg romontsch ei quei support da gronda impurtonza.
WOHNEN SCHWEIZ ei l’Uniun tetgala dallas Associaziuns da habitar. Igl ei in partenari fidau che gida cun sia cumpetenza dil fatg per che projects da construcziun gartegien. A basa d’ina tenuta burgheisa representa ella ils interess da ses commembers. Sco commember dil Cussegl consultativ sustegn jeu l’Associaziun e sias finamiras.
Il Forum Heveticum s’engascha per la capientscha linguistica e culturala denter las regius linguisticas dalla Svizra. La plurilinguitad vivida ei per mei sco Romontsch in fervent desideri.
