Las regiuns muntagnardas ston esser attractivas per tuts. La depopulaziun sa vegnir frenada mo sche las regiuns da muntogna daventan aunc pli attractivas sco loghens da habitar e lavur per la populaziun indigena. Glieud da tut il mund passenta tier nus lur vacanzas e gaudan nossa natira e nossa infrastructura. Quei duei restar vinavon aschia.

L’energia la pli custeivla, favoreivla e cumpurteivla cugl ambient ei l’energia che vegn buca duvrada. Per quei motiv sustegn jeu l’intenziun da crear sistems da stimulaziun per sanar energeticamein baghetgs vegls e per contribuziuns da sustegn en favur da projects integrals ed innovativs che han la finamira da reducir il consum d’energia e las emissiuns da CO2. Aschia contonschein nus las finamiras dil clima fixadas ella Cunvegna da Paris. Las emissiuns da CO2 ston vegnir reducidas per la mesadad entochen igl onn 2030, e quei era enteifer la tiara e risguardond il stan da 1990. Plinavon ston vegnir creai stimuls, per ch’ei vegni renunziau a sgols da cuorta distanza. Per contonscher quellas finamiras eis ei plinavon necessari d’augmentar e migliurar la purschida dallas viafiers per il traffic internaziunal da persunas sco era da rinforzar il traffic da notg silla viafier. L’uiara ella Ucraina ha fatg daventar cunscients che la Svizra drova urgentamein in provediment d’energia autarct.

Per l’emprema gada dapi la fin dalla Secunda uiara mundiala dat ei puspei uiara denter dus stadis en Europa: denter l’Ucraina e la Russia. Ed aunc pli greviont: ei setracta d’ina uiara da cumbat instradada dil president dalla Russia Wladimir Putin. La Svizra – sco pintga tiara neutrala el cor dall’Europa – ei dependenta fundamentalmein ch’il dretg internaziunal vegni respectaus. Mo sche la communitad dils pievels respecta il dretg san era stadis pigns senza materias primas ed armas nuclearas mantener lur suveranitad. In uiara d’attacca che violescha fundamentalmein il dretg internaziunal pertucca era massivamein la Svizra. Lezza ei bein cussegliada da sustener las sancziuns encunter la Russia ed aschia dar in clar signal ch’ella respecta il dretg internaziunal e la suveranitad territoriala dils stadis. Neutralitad munta buca ignorar e profitar dalla situaziun, anzi da seposiziunar claramein silla vart dil dretg internaziunal.