Igl internet spert ei ina premissa elementara per saver porscher adina dapli prestaziuns. L’infrastructura digitala ei era da muntada centrala per scaffir novs posts da lavur, denton cunzun era per mantener ils posts da lavur existents ellas regiuns muntagnardas. Gest interpresas da survetsch savessen – grazia ad in’infrastructura digitala moderna – s’engaschar egl avegnir dapli per scaffir, augmentar e mantener posts da lavur ella muntogna. Ils mieds da communicaziun moderns lubeschan da luvrar a moda independenta dil liug! Perquei s’engaschel jeu buca mo per in’excellenta infrastructura da vias e viasfier, anzi era per in internet spert ed efficient da pindel lad sco part dil provediment da basa en tut las regiuns da nossa tiara. La schanza da quellas tecnologias digl avegnir – cunzun dil spectrum ultra lartg e 5G -ston vegnir nezegiadas. Per che quei gartegi basegna ei in dialog intensiv culla populaziun. Pregiudezis existents ston vegnir reduci ed informaziuns fallidas currigidas. Ellas regiuns da muntogna stuein nus exnum far il pass dil trutg digital alla autostrada digitala. Mo aschia pudein nus dar damogn cun success allas sfidas da destinaziuns economicas e turisticas modernas.