La forza hidraulica ei ina tecnologia da clav sch’ei setracta da renunziar als implonts atomars e da reducir las emissiuns da carburonts. Ils conflicts d’interess denter il schurmetg digl ambient e l’explotaziun dalla forza hidraulica ston vegnir sligiai spert. Las proceduras da lubientscha ston vegnir acceleradas e las prescripziuns simplificadas massivamein. Mo cun quellas mesiras eis ei pusseivel da contonscher a cuorta e mesa vesta la stabilitad necessaria dalla reit. Nus stuein reducir nossa dependenza digl exteriur. Per nies Cantun ein novs implonts hidraulics d’immensa impurtonza. Las regiuns muntagnardas duein nezegiar quellas resursas e saver profitar dapli da quellas. Ils tscheins d’aua ein ina indemnisaziun adequata per la resursa principala dallas regiuns muntagnardas. Quellas ein era en temps energeticamein difficils pli che giustificadas, ina reducziun dils tscheins d’aua vegn jeu era egl avegnir a cumbatter detschartamein.

Medemamein drova ei ina promoziun massiva dalla fotovoltaica. Prescripziuns e restricziuns ston vegnir reducidas, lubientschas ston vegnir concedias pli spert. Medemamein eis ei necessari da metter a disposiziun mieds supplementars da promoziun. En connex cun ina nova revisiun dalla lescha da CO2 drova ei stringentamein ina soluziun pragmatica cun stimuls e taxas directivas enstagl d’engreviar la populaziun dallas regiuns periferas cun aults cuosts supplementars.